د کډوالۍ سازمان ۲۰۲۴ کال کډوالو لپاره خونړی کال بللی
د کډوالۍ نړۍوال سازمان (IOM) په خپل یوه راپور کې ۲۰۲۴ کال د کډوالو لپاره ډېر خونړی کال بللی او وايي چې په دغه کال کې نږدې نهه زره کسان د افریقا صحرايي دښتې او مدیترانې سمندر په ګډون له بېلابېلو لارو څخه د تېرېدو پرمهال مړه او یا نادرکه شوي دي.
نوموړي سازمان تېره ورځ په خپل نوي راپور کې زیاته کړې د کډوالۍ ډېرې خطرناکې لارې لومړی په اسیا او ورپسې بیا مدیترانې سمندر او افریقا دي.
د دغه سازمان د معلوماتو پر بنسټ، په اسیا کې دوه زره ۷۷۸، افریقا کې دوه زره ۲۴۲ او په اروپا کې ۲۳۳ کډوال د لارو په اوږدو کې مړه شوي او یا نادرکه شوي چې د ۲۰۲۳ کال په پرتله د کډوالو د مړینې لوړه کچه څرګندوي.
همداراز مدیترانه سمندر چې پهکې دوه زره ۲۵۲ کسان مړه او یا اوبو کې ډوب شوي، په ۲۰۴۲ کال کې د کډوالو لپاره ترټولو ډېر خونړی ځای بلل شوی دی.
که څه هم امریکا ته د تلونکو کډوالو د مړینې وروستي او کره معلومات لا تر اوسه بشپړ شوي نه دي، خو یاد سازمان وايي چې په ۲۰۲۴ کې د متحدهایالاتو د کډوالو پر لاره یو زرو ۲۳۳ کسان مړه شوي دي.
ای او اېم نړۍوال سازمان خبرداری ورکری چې د کډوالو د مړینې او نادرکۍ اصلي کچه ښايي له هغه څه څخه ډېره لوړه وي چې په دغه راپور کې ځای پر ځای شوې ده.
د یادونې ده چې دغه سازمان څو میاشتې مخکې په یوه بل راپور کې ویلي و له ۲۰۱۴ زېږدیز کال راهیسي په ټوله نړۍ کې ۵۷ زره کسان د کډوالۍ په لارو کې مړه او یا نادرکه شوي دي.
