د افغانستان بانک، د دغه بانک پلاوي د اسلامي اقتصاد او مالي چارو نړیوال فورم په کالني کنفرانس کې یې د ګډون په موخه مالیزیا هېواد ته د سفر په ترڅ کې په څو مهمو غونډو کې د ګډون خبر ور کړی دی.

د معلوماتو له مخې لومړۍ غونډه کې د اسلامي بانکوالۍ د تمویلاتو اړوند تکافل، صکوکو، زکات وقف او بانکي معاملاتو پر برېښنایي کېدو ترڅنګ د خطراتو د مدیریت، مقرراتي چوکاټونو او یو شمېر نورو اړوندو موضوعاتو بحثونه ترسره شوي دي.

دغه راز افغانستان بانک ویلي، په همدې ورځ بله غونډه هم ترسره شوې چې په‌دې غونډه کې افغانستان، ترکیې، عمان، یمن، متحده عربي اماراتو، پاکستان او مالیزیا د مرکزي بانکونو استازو هم ګډون کړی وو.
 یاده غونډه کې د مرکزي بانکونو د شریعه بورډونو تر منځ د همغږۍ په رامنځته کېدو بحث شوی چې غړي هیوادونه به اړوند مهم بانکي موضوعات د مشورو او حل لارو موندلو په موخه له یو بل سره شریکوي. 
د یادونې وړ ده چې د مې میاشتې په ۲۸ او ۲۹ مه نېټه د اسلامي اقتصاد او مالي چارو نړیوال فورم پرانیسته د مالیزیا هېواد د صدر اعظم له لوري شوي چې ګڼ شمېر نورو اسلامي هېوادونو وزیرانو، د مرکزي بانکونو رئیسانو سفیرانو په کې شرکت کړی و.
د معلوماتو له مخې په دې فورم کې پر شرعي اصولو  ولاړ اسلامي مالي نظام پر پراختیا او ښه مدیریت ارزښتناک بحثونه ترسره شوي دي.
ورته مهال د غونډې ویناوالو پر شرعي اصولو ولاړ مالي نظام د اقتصادي پرمختګ، فقر د کمولو او ټولنیز عدالت په رامنځته کولو کې مهم یاد کړی دی.
دغه راز د افغانستان بانک پلاوي د اسلامي مالي خدمتونو د بورډ د رئيس او غړو سره په لېدنه کې د یاد بورډ رئیس د افغانستان بانک کارکوونکو ته د اوږد مهاله او لنډ مهاله روزنیزو پروګرامونو د رامنځته کولو ژمنه هم کړې ده.