د میدان وردګ ولایت رسنیز دفتر وایي، د افغانستان د ښځو د سوداګرۍ او صنایعو عمومي خونې لخوا په دغه ولایت کې د لومړي ځل لپاره د ښځو د سوداګرۍ او صنایعو خونه پرانیستل شوه.
 د افغانستان د ښځو د سوداګرۍ او صنایعو خونې مرستیالې فریبا نوري وویل،دا خونه د خصوصي سکتور په چوکاټ کې له شرعیت سره سم د هېواد په ۲۰ ولایتونو کې فعالیت کوي.
ورته مهال د یاد ولایت د اقتصاد رییس مولوي عبدالحکیم حامد وویل، میدان وردګ یو زراعتي ولایت دی او زیاتو یې کړه چې ښځو لپاره د سوداګرۍ او صنایعو په برخه کې د دې څانګې پرانیسته اړینه ده.
دغه راز د سوداګرۍ او صنایعو خونې اجرآیوي رییس ذکرالله نوري وویل، دغه ولایت کې ډېرې ښځې شته چې د لاسي صنایعو، د لبنیاتو د پروسس، روب او مربا جوړولو برخه کې ښې تجربه لري.