په پاکستان کې ځایې مسوولانو خبر ورکړی چې د یاد هېواد له لاهور او پنجاب ښارونو څخه د افغان کډوالو د ویستلو لړۍ پیل شوې ده.

پاکستانۍ "ډان"ورځپانې په پېښور کې د افغان کمېشنرۍ د یوه لوړ پوړي چارواکي له قوله خبر ورکړی چې په پاکستان کې میشتو د ای سي سي کارت لرونکو افغان کډوالو د ویستلو بهیر به د پنجشنبې په ورځ پیل شي.

بل پلو په پاکستان کې مېشت د ای سي سي کارت لرونکي افغانان وایې چې پاکستاني پولیس یاد کارت د پاملرنې پرته دوی نیسي.

له پاکستانه د افغان کډوالو د ویستلو دویم پړاو په داسې حال کې پیل کېږي چې وړمه ورځ په پاکستان کې د سرپرست حکومت سر قونسل د افغان کډوالو د ځورونې په تړاو د سند د اعلی وزیر له ژمنې کولو خبر ورکړی و.