د سرپل ولایت د مطبوعاتو دفتر پر اېکس‌پاڼه راغلي چې د یاد ولایت په بېلابېلو ولسوالیو کې به د ۱۹۸ میلیونه افغانیو په ارزښت د نهو عامه روغتونو د جوړېدو چارې پیل شي.

د یاد ولايت مرستیال والي مولوي حبیب الله ویلي چې په دغه پروژه کې د هر روغتون له پاره له عادي بودیجې څخه ۲۲ میلیونه افغانۍ ځانګړې شوې دي.

د نوموړي په وینا د دغه روغتونو سربېره په یاد ولایت کې د ګلوبل پند موسسې په مالي ملاتړ ۱۰ صحي مرکزونه (FHH) په لري پرتو او محرومو سیمو کې جوړېږي.

نوموړي زیاته کړه چې درې نور کلینکونه د (SHC) روغتیایې نړۍوال سازمان له لوري (WHO) دفتر په مالي ملاتړ د یاد ولایت په البدر ولسوالۍ کاشان کلي کې جوړېږي.

ددغه پروژو عملي چارې د سرپل ولایت په مرکز علف سید او د صیاد ولسوالۍ اقسو کې ډېر زر پیل شي.

د يادونې ده چې سرپرست حکومت د هېواد په ۳۱۸ ولسواليو کې د کلينيکونو جوړېدو لپاره اووه ميليارده افغانۍ بودیجه منظوره کړې ده.