په افغانستان کې د ماين پاکۍ د چارو د همږۍ لوی رياست وايي، چې په تېرو نږدې ۶ مياشتو کې د ماین چاودنو ۷۷ افغانان وژلي او او ۱۴۰ نور يې ټپيان کړي دي.
د دغه رياست رئيس نورالدين رستم خېل زیاتوي، چې د ۲۰۲۳ کال له پیل څخه په ټول افغانستان کې ۱۰۷ بېلابېلې پېښې رامنځته شوي دي، چې د دغو پېښو ډېر قربانيان ماشومان دي.
نوموړی زیاتوي (( تراوسه پورې د ۱۰۷ حادثاتو شاهدان یاستو چې په هغه کې ۲۱۷ تنه قربانیان لرو. په مجموع کې له دغو ارقامو څخه ۱۲۳ تنه هغه بیا ماشومان دي.))
په افغانستان کې د څو لسیزو جګړو زرګونه افغانان وژلي او زرګونه نور يې ټپيان کړي دي.
په همدې حال کې د ماین د چاودنو ځينې قربانیان له نړیوالې ټولنې غواړې چې په افغانستاه کې د ناچاوده توکو د لمنځه وړلو لپاره دې کار وکړي.
د ماين د چاودنو د قربانیانو د کورنۍ غړی عرفان الله وايي، چې دوه اولادونه یې د ماین په یوه چاودنه کې وژل شوي دي.
عرفان الله زیاتوي ((دوه زامن مې شهیدان شول. یو یې د ۹ کلونو و او بل د پنځه کلونو وو. دوی بیرون په صحرا کې لوبې کولې چې یوه زړه مرمۍ پرې چاودېدلې وه او دوی یې قربانيان شول.))
د ناچاوده توکو د قربانیانو د کورنۍ ځینې نور غړي بیا د موسساتو له فعالیتونو ګيله لري.
د محمد په نوم د قربانيانو د کورنۍ يو غړی چې زوی یې د ماین په چاودنه کې وژل شوی وايي، چې سیمې ته یې د ناین پاکۍ هېڅ موشسه ده ورغلې.
دی زیاتوي ((له بده مرغه په دغو تېرو څو کلونو کې د هېڅ ماین پاکی موسسه زمونږ سیمې ته نه ده راغلې او نه هم مسوولینو اقدام کړی او نه یې چاته پوهاوی کړی دی.))
په افغانستان کې د ماين پاکۍ د موسسو ځینې کارکوونکي وايي، چې دوی په دې هڅه کې دي تر څو د هېواد ټولې سیمې د ناچاودو ماینونو څخه پاکې کړي.
ماین پاک ګل رسول وايي (( موخه مو دا ده چې ناچاودي توکي او مهمات له هېواد څخه ورک کړو. تر څو زمونږ ټول هېوادوال په ازاده فضا کې ژوند وکړي.))
د هېلو ټرسټ په نوم د ماین پاکۍ د یوې موسسې د معلوماتو له مخې په ۲۰۲۲ کال کې هم په ټول افغانستان کې ۸۶۴ کسان د ناچاودو ماینونو د چاودنې له امله قرباني شوي دي.
د ماین پاکۍ چارو د همغږۍ ریاست د معلوماتو له مخې، اوس‌مهال هم په افغانستان کې ۱۲۲۳ کیلومتره مربع ځمکه په ماینونو او ناچاودېدونکو توکو پوښلې پاتې ده.