د ټرافیکو عمومي ریاست خبر ورکړی چې د اختر په لومړیو څلورو ورځو او شپو کې په ټول هېواد کې ۸۰ ټرافیکي پېښې رامنځته شوي چې ۱۸۵ تنو ته په‌کې مرګ ژوبله اوښتې ده.

ددغه ریاست په خبرپاڼه کې راغلي چې په یادو ټرافیکي پېښو کې ۳۰ تنه مړه او ۱۵۵ نور ټپیان شوي دي.

خبرپاڼه کې همداراز لیکل شوي چې د مړو شوو کسانو په ډله کې ۱۹ نارینه، دوه ښځې او نهه ماشومان شامل و او همدارنګه د ټپیانو په ډله کې ۱۱۷ نارینه، اته ښځې او ۳۰ ماشومان شامل وو.

د ټرافیکو د لوی ریاست له لوري په خپره شوې خبرپاڼه کې راغلي سږکال د عامه پوهاوي کمپاینونو، د ټرافیکي پېښو په تړاو د خلکو د عامه پوهاوي لوړوالی او د اختر په ورځو شپو کې امنیتي تدابیر ددې لامل شوي چې د تېر کال په پرتله سږکال د ټرافیکي پېښو او مرګ ژوبلې اندازه ټیټه وه.

د یادونې وړ ده چې تېر کال هم د اختر په څلورو ورځو او شپو کې ۹۸ ټرافیکي پېښې رامنځته شوې وې چې له امله يې ۵۰ تنه مړه او  ۱۸۵ نور ټپیان شوي و.