اسلام‌اباد کې افغان سفارت پر اېکس پاڼه خبر ورکړی چې افغان سفیر سرداراحمد شکیب د ملګرو ملتونو د عالي کميشنرۍ (یونسیار) له مشرې فیلیپا کندلر سره کتلي دي.

خبرپاڼه کې راغلي چې په دغه لیدنه کې افغان سفیر په دې وروستیو ورځو کې په اسلام اباد او راولپنډۍ کې د افغانانو د نیولو او ځورونې په اړه اندېښنه ښودلې او ټینګار یې کړی چې د POR, ACC او شارپ ټوکن لرونکو افغانانو له حقونو دفاع او د هغوئ لپاره د لازمو اسانتیا برابرولو برخه کې دې یونیسیار لازم اقدامات ترسره کړي.

شکیب همداراز ویلي چې پاکستاني پولیس په یاد هېواد کې د افغانانو کورونه تالاشې کوي او حتی هغه وګړي چې قانوني اسناد او ویزې لري نيسي او په ځینو حالاتو کې ور څخه د ډېر رشوت او پیسو غوښتنه کوي.

د کډوالو لپاره د ملګرو ملتونو د عالي کمیشنرۍ مشرې هم د افغان کډوالو په تړاو د پاکستانیو ادارو د وروستیو اقداماتو په اړه اندېښنه ښودلې او ویلي یې دې چې په دې اړه د ځورونې شکایاتونه موږ ته هم رسېدلي دي.

خبرپاڼې د فیلیپا کندلر له قوله لیکلي چې په دې هکله یې د پاکستان حکومت او په ځانګړي ډول د سفران، داخله او خارجه وزارتونو سره ډېرې غونډې کړې دي ترڅو موږ مطمیئن شو چې له افغان کډوالو سره دا ډول چلند پای ته ورسېږي.

نوموړې ویلي چې په راتلونکو څو ورځو کې به هم په دې اړه له پاکستانيو چارواکو سره خبرې ولري.

دا په داسې حال کې ده چې ډېرو افغانانو د لسیزو را په دېخوا په راولپنډۍ کې د پاکستاني پولیسو له وېرې خپل دوکانونه او کاروبارونه بند کړي دي.