د ملګرو ملتونو مرستندویه دفتر"یوناما"د ماینونو له خطرونو څخه د پوهاوي د نړۍوالې ورځې په مناسبت خبر ورکړی چې افغانستان لا هم له هغو هېوادونو څخه دی چې د ماینونو او له جګړو څخه د پاتې شونو توکو له امله ډېر زیانمن شوی دی.

له دغه دفتر څخه نن په یوه خپاره شوي ویډیوې پیغام کې راغلي چې نن(د اپرېل څلورمه)د ماینونو د خطرونو په اړه د نړۍوال پوهاوي او د ماین پاکۍ په چارو د مرستو ورځ ده او دا یو فرصت دی چې د افغانستان په رقم هېوادونو کې ددغه کړاوونو په اړه فکر وشي.

ددغه دفتر څخه په خپاره شوي پیغام کې ویل شوي چې په افغانستان کې د ماینونو او یا له جګړو څخه د پاتې شونو توکو له امله په تېرو څو لسیزو کې زرګونه ملکي وکړي یا وژل شوي، یا ژوبل او یا یې هم د بدن کومه برخه له لاسه ورکړې ده او اوس مهال یې هم ډېری قربانیان افغان ماشومان دي.

یوناما ویلي چې افغانستان له دغه وضعیت څخه د ویستلو په برخه پراخې نړۍوالې مرستې ته اړتیا لري او په وینا یې چې دغه ملاتړ نه یواځې د انسانانو ژوند ژغوري بلکې د یوه خوندي، باثباته او هوسا راتلونکي لپاره پانګونه ده.