د کونړ د ټولګټو ریاست خبر ورکړی چې د یاد ولایت د پشد او حکیم‌اباد پلونه چې پخوا د سېلابونو له امله نړېدلي وو، تېره ورځ یې د بیارغونې چارې پیل شوې چې ۶۳ میلیونه افغانۍ لګښت به ورباندې وشي.

په خبرپاڼه کې راغلي چې د پشد دویم پل د ۲۰۰ مترو په اوږدوالي او د څلور مترو په پراخوالي سره د نرنګ او سرکاڼو ولسوالیو له یوې بلې او خوا همدارنګه د کونړ ـ جلال‌اباد له عمومې سړک سره نښلول کیږي.

دغه راز د حکیم‌اباد پُل د ۳۰۰ مترو په اوږدوالي او د ۱۲ مترو په پراخوالي سره د کونړ ډېرې سیمې له مرکز اسعد‌اباد سره نښلوي.

خبرپاڼه کې راځي، د دې دوو پروژو د کارونو پیل په داسې حال کې شوی دی چې د ټرانسپورټ وزارت سرپرست کونړ ته د خپل سفر په ترڅ کې د دغو پلونو د جوړولو خبره کړې وه.

د یاد ولایت ځایې مسوولانو د دغو پلونو د ویجاړېدلو علت زورور سېلابونه بولي خو خلک بیا ادعا کوي چې دې پروژو کې د پراخ فساد له امله یې کیفیت ته هیڅ ډول پاملرنه نه وه شوې.

د یادونې ده چې د دغو پلونو په بیارغونې سره به د سیمې زرګونو کورنیو ته د تګ - راتګ اسانتیاوې برابرې شي.