دایکندي کې د یوه ښوونځي لسګونه ښځینه ښوونکې او زدهکوونکې مسمومې شوې
سیمه ییز مسوولین وایي، په دایکندي کې د ۱۵ ښځینه ښوونکو په ګډون ۴۶ زده کوونکې مسمومې شوې دي.
د یاد ولایت د اطلاعاتو او فرهنګ رئیس، سید مصطفی صالح ویلي، دغه پېښه تېره ورځ د کیتي ولسوالي اړوند د «تمران» په نوم د نجونو په یوه ښوونځي کې رامنځته شوې ده.
صالح زیاته کړې، مسموم شوې ښوونکې او زدهکوونکې سیمهییز روغتون ته وړل شوي چې د درېیو تنو وضعیت په کې نازک دی.
د سرچینې په خبره، ناروغانې د اکسېجن له کمښت سره مخ دي.
که څه هم تر اوسه د پېښې لامل نه دی روښانه شوی؛ خو مسوولین وایي، په اړه یې څېړنې پیل شوې دي.
دا د دایکندي په کیتي ولسوالي کې د نجونو زده کوونکو د مسمومېدو لومړنۍ پېښه بلل شوې.
باید وویل شي چې تر دې وړاندې هم د هېواد په یو شمېر ښوونځیو کې د نجونو د مسمومېدو خبرونه ورکړل شوي وو.
تېر کال هم د سرپل د سانچارک ولسوالي په دوو دولتي ښوونځیو کې شاوخوا ۸۰ تنه زده کوونکي او ښځینه ښوونکې مسمومې شوې وې، چې پراخ غبرګونونه یې راوپارول.
دا په داسې حال کې ده چې سرپرست حکومت له شااوخوا درېیو کلونو راهیسې له شپږم ټولګي پورته د نجونو پر زدهکړو بندیز لګولی دی.
