بامیانو کې د پروني برید په تړاو غبرګونونه؛ په پراخه کچه غندل شوی
په بامیانو کې د پروني برید په تړاو غبرګونونه؛ سرپرست حکومت او یو شمېر هېوادونو په پراخه کچه غندلی دی.
سرپرست حکومت په بامیانو کې پر بهرنیو وګړو برید غندلی او ویلي یې دي چې د دغه برید عاملین به ژر تر ژره پیدا کړي.
د کورنیو چارو وزارت ویاند عبدالمتین قانع پر خپله اېکس پاڼه لیکلي چې اسلامي امارت د پېښې له قربانیانو سره خپله خواخوږي ښيي.
په همدې حال کې اروپايي ټولنې هم یاد برید غندلی او د پېښې له قربانیانو سره یې ژوره خواخوږي څرګنده کړې ده.
بل لورته د افغانستان لپاره د امریکا ځانګړي استازي ټام وېسټ هم پر دغه برید د خواشیني څرګندولو ترڅنګ پر خپله اېکس پاڼه لیکلي چې لاهم په افغانستان کې تاوتریخوالی لهمنځه نه دی تللی.
ورته مهال ایران هم پر یاد برید ژوره خواشیني ښودلې او دا یې یوه ترهګریزه کړنه بللې ده.
د کورنیو چارو وزارت د معلوماتو له مخې، تېره ورځ مازیګر مهال د نامعلومو وسله والو په برید کې په بامیانو کې یو افغان او درې بهرني وګړي وژل شوي او د یو بهرني په ګډون څلور نور ټپیان دي.
د یاد وزارت ویاند ویلي چې د پېښې په تړاو څلور مشکوک کسان نیول شوي دي.
که څه هم اسلامي امارت د بهرنیو وګړو د هویت په اړه څه نه دي ویلي؛ خو د هسپانیا حکومت تائید کړې، چې وژل شوي سیلانیان د دغه هېواد وګړي وو.
د هسپانیا لومړي وزیر پیدرو سانچیز پر خپله اېکس پاڼه لیکلي، چې دغې پېښې سخت ټکان ورکړی دی.
د رویټرز د راپور له مخې، په دې برید کې ژوبل سیلانیان د اسټرالیا، ناروې او لیتوانیا وګړي دي.
تر اوسه د دغه برید مسوولیت کومې ډلې نه دی منلی.
په بامیانو کې پر بهرنیو وګړو له برید وروسته، د برېټانیا حکومت له خپلو وګړو غوښتي چې افغانستان ته له سفر کولو ډډه وکړي.
بامیان د تفریحي ځایونو، لرغونو اثارو او ښکلو منظرو د لرلو له امله د کورنیو او بهرنیو سیلانیانو د پام وړ سیمه ده.
د نوي حکومت په راتګ سره هېواد ته د بهرنیو سیلانیانو راتګ زیات شوی چې چارواکي یې لامل د بشپړ امنیت ټنګښت په ګوته کوي.
