د ټرانسپورت او هوایې چلند وزارت خبر ورکړی چې نن ورځ(چهار شنبه)د هېواد په ۱۸ ولایتونو کې د باران، واورې، بریښنا او ناڅاپي سېلابونو د راوتلو احتمال شته.

ددغه وزارت لخوا په خپره شوې خبرپاڼه کې راغلي چې دغه بارانونه، واورې او سېلابونه به په بدخشان، تخار، نورستان، لغمان، کنړ، ننګرهار، کابل، کاپیسا، پنجشېر، پروان، بغلان، کندز، بلخ، جوزجان، سرپل، بامیان، میدان وردګو، فاریاب او سالنګونو کې رامنځته شي.

د خپرباڼې د مالوماتو له مخې په بېلابېلو سیمو کې د باران اندازه له ۱۵-۳۵ ملي مترو پورې ښودل شوې او د واورې اندازه له ۱۰-۲۰ ملي مترو پورې اټکل شوې ده.

خبرپاڼه کې همداراز لیکل شوي د سالنګونو په ګډون په جنوبي، جنوب ختیځو او مرکزي ولایتونو کې د تېزو بادونو د لګېدلو احتمال شته چې سرعت به یې په یوه ساعت کې په بېلابېلو سیمو کې له ۵۰-۸۵ کیلو مترو پورې ورسېږي.