د پاکستان سرپرست لومړي وزير په واشنګټن کې د بهرنیو اړیکو د شورا یوه فکري مرکز کې د خبرو پر مهال ویلي، اسلام اباد هڅه کوي، طالبان دې ته اړ باسي چې د نجونو د زده کړو حقونو او د نورو هېوادونو پر وړاندې د افغان خاورې د نه کارېدو په تړاو خپلې ژمنې عملي کړي.

هغه زياته کړې، دوی او نوره نړۍ د افغانستان په اړه او په ځانګړې توګه د ښځو او نجونو په اړه مشترکې اندېښنې لري.

کاکړ ويلي، له بشري اړخه د امريکا او نورو هېوادونو له لوري د افغانستان د لاسنیوي ملاتړ کوي.

هغه په افغانستان کې امن او ثبات د پاکستان لپاره ضروري او د دغه هېواد له لومړيتوبونو څخه ګڼلی دی.

کاکړ همدا راز د ملګرو ملتونو عمومي ناسته کې د خبرو پر مهال ويلي، باثباته افغانستان د پاکستان او متحده ایالتونو د بهرنۍ پالیسۍ په لومړیتوب کې دی.

هغه زياته کړې: «په افغانستان کې سوله د پاکستان لپاره یوه ستراتیژیکه اړتیا ده. موږ د افغانستان په اړه له نړیوالې ټولنې سره په ځانګړې توګه د ښځو او نجونو د حقونو په اړه اندېښنې شریکوو، موږ د افغانستان له بې وزلو وګړو سره چې افغان نجونې او ښځې تر ټولو زیانمنې دي، د بشري مرستو د دوام ملاتړ کوو.»

انورالحق کاکړ د پاکستاني طالبانو د تحريک، داعش او نورو ډلو لخوا د افغانستان له خاورې پر پاکستان د بريدونو غندنه کړې ده او ويلي يې دي، چې هېواد يې د ترهګريزو حملو د مخنيوي لپاره ضروري ګامونه پورته کوي.

کاکړ د افغانستان له خاورې پر پاکستان د بريدونو ادعا په داسې حال کې تکراروي، چې افغان حکومت د دې خبرې په مقابل کې همېشه غبرګون ښودلی او د نورو هېوادونو پر ضد یې د افغانستان د خاورې کارېدل رد کړي دي.