هرات ولایت کې د طالبانو د علماوو شورا مشر مولوي محمد بشر حليمي دې ولایت کې د یوې ولسي غونډې پر مهال ویلي، چې اوسنی حکومت د نجونو ښوونځي او مکتبونه د وېرې او فتنې له امله تړلي دي.

هغه زياته کړې، چې که وېره او فتنه نه وي موجود؛ نو د نجونو پر مخ د به ښوونځيو او پوهنتونو دروازې پرانېستل شي.

نوموړي په دې اړه ډېر وضاحت نه دی ورکړی.

مولوي بشر ويلي، چې د يوه ديني عالم او مسوول په توګه یې د نجونو د زده کړو په اړه د خلکو غوښتنه د حکومت تر مشرتابه مولوي هبة الله اخندازاده رسولې ده.

د نجونو پر مخ د ښوونځيو د تړل کېدو دوه اود پوهنتون د تړل کېدو يو کال پوره کېږي؛ خو لا د بندېدو د علتونو په اړه وار په وار نوې خبرې مخې ته راځي.

تر دې مخکې ځينې حکومتي مشرانو د نجونو د ښوونځيو د تړل کېدو علتونه نيمګړی تعليمي نصاب، کلتوري محدوديتونه، د شرایطو نابرابروالی، بې حجابي او ورته نورې ستونزې بللې دي.

د زيات شمېر کورنيو او نړۍ‌والو غبرګونو وروسته هم اوسني حکومت د نجونو د زده کړو د پيل په اړه کومه مشخصه نېټه او وعده نه ده کړې.

حکومتي چارواکي په خپلو څرګندونو کې وايي، چې د نجونو زده کړې یې تر امر ثاني ځنډولي او د بيا پيل لپاره یې د مشرتابه امر ته په تمه دي.

د نجونو پر زده کړو تر بنديزونو وروسته زرګونه افغان نجونې نورې هېوادونو ته کډه شوي او زيات شمېر نورې یې د هېواد دنننه په ناوړه رواني وضعيت کې قرار لري.