د ملګرو ملتونو عمومي منشي انتوني ګوترېش او د دغه سازمان د پرمختیايي پروګرام مشر اچیم شټاینر ویلي، اړتیا ده چې په غزه کې سمدستي اوربند وشي او ټول یرغمل شوي کسان خوشې شي.

دوی ویلي، په روانه جګړه کې ملکي وګړي وژل کېږي، نو اړتیا ده، چې د دوی د خوندیتوب لپاره ګامونه واخیستل شي.

سره له دې چې ملګرو ملتونو تر دې وړاندې هم ډېر ځله د اوربند غوښتنه کړې؛ خو اسرائیل وايي د خپلو یرغمل شویو کسانو تر خلاصون پورې به جګړې ته دوام ورکوي.

د راپورونو له مخي، پر غزه د اسرائېلو د یرغل له پیل راهیسې تر اوسه تر ۳۲ زرو زیات کسان وژل شوي او له ۳۵ زرو زیات ټپیان دي، چې ډېر یې ښځې او ماشومان دي.

خبرياله: خاطره اکبري