لغمان کې د ترافيکي پېښې له امله دوه تنه مړه او لس نور ټپيان شوي دي
د لغمان امنیه قومندانۍ په يوې خبرپاڼه کې ويلي، چې د کابل جلال اباد پر لويه لاره د يو بکسه موټر د چپه کېدو له امله ۲ تنه مړه او لسنور ټپيان شوي دي.
خبرپاڼه زياتوي، چې دا پېښه نن ماسپښين ۱۲ بجې د لغمان ولایت اړوند محمد علي مڅ سيمه کې رامنځته شوې ده.
اعلاميه کې راغلي، چې په ټپيانو کې يوه ښځه هم شامله ده.
د دې پېښې علت د موټر چلوونکي بې احتياطي ښودل شوې ده.
د لغمان امنیه قومندانۍ وايي، چې سيمې ته د ترافیکو ریاست مسوولین رسېدلي او ټپيان يې د مهترلام ولایتي روغتون ته انتقال کړي دي.
په اعلامیه کې د ټپيانو روغتيايي حالت د ډاډ وړ ښودل شوی دی.
د کابل - جلال اباد لویه لار د هېواد له خونړیو لویو لارو څخه ګڼل کېږي او لږ تر لږه هره ورځ د ترافیکو پېښو شاهده وي.
د سړک تنګوالی، د موټرو زیاتوالی او د موټر چلوونکو بې احتياطي پر دې لاره د ترافیکو پېښو مهم علتونه ګڼل کېږي.
