مايکل وان: افغان کرکټ ملي لوبډله په آسیا کې له هند وروسته دويمه غوره لوبډله ده

د انګلستان کرکټ ملي لوبډلې پخواني کپتان مایکل وان ويلي، د افغانستان کرکټ لوبډله په اسيا کې له هند وروسته دويمه غوره لوبډله ده.
نوموړي دغه څرګندونې وروسته له هغې کړي چې تېره ورځ افغان کرکټ ملي لوبډلې اسټراليا ته په روان شل اوريز نړۍوال جام کې ماتې ورکړه.
نوموړي دغه راز د افغان لوبغاړو وړتيا او د راشد خان لوبډلمشري ستايلې او ويلي يې د د افغان لوبډلې راتلونکې د وړاندوينې وړ دی.
ده همداراز ويلي، د افغان لوبډلې له لوري سترو لوبډلو ته ماتې ورکول د تعجب وړ خبره نده او دا د افغان لوبغاړو عالي لوبېدنه ده.
تازه د افغان لوبډلې په اړه د افغانستان پخواني روزونکي انظمام الحق ويلي، د راشد خان شتون د دې لامل شوی چې افغان لوبډله سترې لوبډلې ماتې کړي.
د ده په خبره، راشد خان لوبډلې ته د سترو لوبډلو د ماتولو ذهنيت ورکړی او دی خپله ستر لوبغاړی دی.
د افغانستان وروستۍ بريا د کرکټ د ګڼو مبصرينو پام ځانته راړولی دی.